Ano Escolar (AE-2025) ne’ebe hahu iha fulan Janeiro to’o iha Dezembro, Escola Secundária Geral Nino Konis Santana (ESG-NKS) Lospalos, realiza içar Bandeira Nacional iha arredor eskola, iha kada fulan primeira semana, sempre hala’o serimonia içar bandeira nacional, hodi hanoin no fo honra ba herois nacionais sira, liu-liu mahein ESG NKS Lospalos (Antonino Konis Santana).
Iha momento hirak ne’e, Gabinete Diretiva nu’udar Ispetur Içar Bandeira nian, sempre fo hanoin no moral ba estudantes sira atu bele tuir regulamentu eskola nebe estabelese tiha ona, rona professores sira ne’ebe fahe nia matenek ba sira, atu future bele sai ema diak ba nasaun RDTL, liu-liu ba municipio Lautém. Respeita professores sira no kolegas sira, estuda maka’as iha eskola no iha uma, halo relasaun diak ho kolega sira no professores sira, evita problema iha arredor eskola.
Entre Serimonia Içar Bandeira Nacional hirak ne’e, ESG NKS Lospalos mos responsabiliza nu’udar Corpo Içar Bandeira Nacional iha loron bo’ot 20 de maio nian a nivel postu, iha postu Lospalos nebe realiza iha aredor Officio Presidente Autoridade Municipal de Lautém, ezekuta ho diak, ho Ispetor da Serimonia Administrador Postu Lospalos, Sr.Oldeiro Coimbra nebe leh mensagem Presidente da RDTL iha eventu refere.
Alein ida ne’e mos hala’o içar bandeira nacional iha aredor eskola hodi komemora loron falintil (F-FDTL), ho nia tema “Habelar Dame ba Mundu Tomak” ne’ebe lidera husi PNTL ida nu’udar representante inan aman nian iha eskola refere. Iha momentu importante ne’e Nia fo mensagem katak; Ohin loron ne’e ita relembra fali tinan 50 liu ba kotuk, ho nia benefisiu sira nebe Falintil sira ezekuta iha ailaran, nu’udar filosofia luta nian mak, “mate ka moris ukun rasik-an”, soke ita nia fuan no kakutak husi saudosu sira nia prinsipiu sira, tuir mai ne’e:
- Nicolau Lobato: “A última bala é a minha vitória”
- Vicente Reis (Sahe): “Ita tenki sei sai maubere oan loloos”
- Juvinal dos Reis (Sera Key): “povu mak bee, Falintil mak ikan”.
Filosofia hirak ne’e mak halo sira sakrifika-an, hodi liberta rai ida ne’e, mo ikus mai ita ukun-an. Prinsipius sira ne’e soke ita, atu ita bele iha “disiplina, matenek, serbisu no unidade” iha eskola ida ne’e, ne’ebe nia mahein saudoso Nino Konis Santana. Ho prinsipiu filosofia haat ne’e mak ita bele desenvolve ita nia rai kikoan ida ho hakmatek no prospero, nune’e ikus mai imi bele hetan future diak.
Içar Bandeira ikus mak iha dia 6 de Outubru 2025, ne’ebe dirigi husi Diretor Eskola katak, “Serimonia IBN (Içar Bandeira Nacional) iha aredor eskola ne’e mak ikus ona ba finalista sira 12o ano nian, hodi luta hasoru Exame nacional no Lokal iha dia 20-27 Outubro 2025, no mos ba estudantes sira husi 11o no 10o ano atu prepara-an ba Exame pasagem da klasse nebe sei realiza iha dia 17-22 novembro 2025 be mai”.
By prof. EdoSantos’25
