Moris iha tempu agora la’os fasil, ita sempre hasoru dezafius barak, maibe ho dezafius hirak ne’e mak fo motivasaun barak mai ita atu estuda, atu goza, atu aprende, situasaun sira ne’e jerasaun sira uluk la hetan, tan ne’e ita tenki esforsu-an hodi aprende, hodi harohan ba Nai, atu nune’e bele atinji ita nia mehi iha futuru ida ne’ebe diak liu agora. Tenik Arca.
Liafuan murak ne’e husi Aluno ho naran kompletu Arcanjo Dias Quintas, estudante finalista atual husi ESG NKS Lospalos, nu’udar estudante mane bonitu ida ne’ebé matenek/intelijente iha ninia eskola, tuir atividade extrakurikular hanesan: “hala’o debates entre eskolas, tuir corro iha eskola no igreja, tuir formasaun child fund hodi fahe formasaun, kria organizasaun hodi halo treinamentu”.
Arcanjo Dias Quintas, nu’udar mane bonito no potensial ida husi Ponta Leste, Suco Fuiloro, Postu Administrativo Lospalos. Oan da-walu ou daikus, husi parseiru Francisco Dias Quintas no Madalena Mendes ne’e moris iha Lospalos, iha loron 4 maio 2007.
Mane bonito ne’ebe ho naran naran estimado ka naran bolu “Arca”, husi nia familia no kolega sira, agora dadauk sai estudante finalista husi eskola ESG Nino Konis Santana de Lospalos.
Nia moris husi familia ida ne’ebé nakonu ho domin, maski nia oan daikus ou da-valu husi maun alin nain valu, bin nain neen no maun ida ne’ebe sempre fo suporta no fo hanoin kona ba prinsipiu moris nian, oinsa respeita ema seluk, oinsa ajuda inan, aman, maun no bin sira iha uma, oinsa uja didi’ak tempu, no sempre agradese ba buat hotu ne’ebé iha hodi halo orasaun, no sempre estuda maka’as nune’e bele sai susesu iha future.
Oan mane ikun husi maun-alin nain hitu (7) ne’e, moris husi familia ida ne’ebe simples no tau importansia maka’as ba edukasaun, wainhira Nia sei kiik nu’udar labarik ida ne’e ativu teb-tebes hodi atividade sira, iha eskola, komunidade no iha igreja, tan ne’e nia esforsu-an hodi aprende no kuriosu tebes, hodi hakarak hatene buat hotu-hotu, hetan suporta husi nia bin sira no maun bo’ot.
Mane bonito ne’ebe nia mehi hakarak sai Jovem Kreativu iha future ne’e, hahu nia estudu Pré Escolar to’o Ensino Básico 1o no 2o Ciclo iha EBF Home Lospalos, no termina iha tinan 2019. Tempo la’o nafatin nia kontinua ninia estudo iha Pré-Secundário ou Ensino Básico 3o Ciclo, iha EBC Centro Lospalos durante tinan tolu no termina iha tinan 2022, no hetan klassifikadu top ten.
Tempu kontinua la’o nafatin, Nia hakat ba Ensino Secundário Geral Nino Konis Santana Lospalos iha tinan 2023, hodi hili Programa CT (Ciência Tecnologia) no oras ne’e dadaun nia sai finalista atu tuir Exame Nacional iha tinan 2025. Ho rezultado positivo ne’be nia hetan durante ne’e, sempre hetan klassifikadu top ten iha ninia turma laran, sai nu’udar pioneiro exemplar ba nia kolega sira seluk hodi tuir ninia ain fatin.
Nudar Inan, aman, maun no bin sira ne’ebé sempre estima nia tamba oan ikun, sempre fó motivasaun no korajen ba Nia atu bele estuda no estuda nafatin to’o hetan susesu iha futuru ne’ebe diak. Husi rezultadu estudu ne’e mak nia hatudu iha eskola katak, hahú husi ensino básico mai to’o secundário sempre sai top ten iha eskola, iha nia viajen estudu nian. Inan, aman, maun no bin sira sempre fo motivasaun atu ba eskola tenke esforsu-an estuda maka’as, dixiplina, rona no respeita mestre mestra sira.
Nia pai sempre fo motivasaun katak, lalika tuir hau nia dalan, aprende ba hodi sai ema ne’ebe diak no bo’ot iha future, Apa pronto atu luta hamutuk ho ó to’o i’is kotu. Nune’e mos nia mãe sempre fo hanoin ba nia katak, ama hadomi o no sei akompanha nafatin o nia dalan ho orasaun, lalika tauk hodi esforsu tamba Maromak sempre akompanha nafatin o.
Mane bonito no ativo ne’e ho vontade bo’ot hakarak haklean nia kuñsimentu, nune’e nia kontinua nia estudu iha iha Eskola Secundária Geral (ESG) Nino Konis Santana Lospalos iha tinan 2023 to’o agora. Durante Eskola, Arca ho fitun Taurus ne’e sempre hetan klasifikasaun top ten no hetan premiu balun husi eskola, no husi fatin formasaun sira seluk.
Loron sempre muda ba kalan nu’udar prosesu aprendijazen ida ne’ebé Arca hasoru, dala ruma hetan valor diak, maibe dala ruma mos hetan valor la tuir nia hakarak, maibe nia sempre hetan motivasaun husi nia familia liu-liu nia Pai, no Mãe atu firme nafatin hodi estuda.
Nia nudar mane ikun husi maun ida no bin nain ne’en, Nia sempre hetan suporta no motivasaun husi ninia apa, ama, maun no bin sira, ne’ebe fó apoiu materiál no spiritual balun ba nia atu bele kompleta nia nesesidade baziku no eskola nian. Nune’e iha eskola nia sempre hetan fiar husi eskola atu representa eskola ba tuir eventu sira iha liur hodi hamorin eskola nia naran, durante hala’o ninia estudu iha 12o ano.
Normalmente oan ikun ne’e ho manhozo, maibe ida ne’e la akontese ba nia, ho suporta familia nian, liu-liu nia Pai no Mãe ne’ebe sempre fo motivasaun ba nia, halo Arca konsege tuir atividade sira hanesan, kooru eskola nian, igreja no organizasaun naun formal balun, representa eskola ba debate publiku entre eskolas iha kompetisaun ne’ebe governu no NGO balun mak realiza.
Mane bonito ne’ebe gosta kanta, leh livru no halo diskusaun ne’e, lakohi lakon ho kolega sira iha estudo, tan ne’e materia hotu-hotu importante ba nia atu estuda, tamba iha interligadu no sai útil iha future be mai, tan ne’e nia la husik ida no kaer metin ida. Maibe ba nia materia hirak ne’e hotu-hotu importante, tan ne’e nia fahe tempu hodi estuda materia hirak ne’e, maske difisil maibe sempre koko no tenta nafatin atu estuda, nune’e nia rezultadu ikus sai top ten nafatin iha ninia turma. Iha sala laran nia sempre ativa hodi halo exercicio iha oin wainhira professor sira fo tempu, ativa hodi husu pergunta sira ne’ebe iha ligasaun ho material ne’ebe nia tuir no aprende ba.
“Liu husi atividade hirak ne’e ha’u aprende buat barak, nu’udar oportunidade ida ne’ebe mak iha ita uza hodi halo diak ba kolega sira no respeita mestre sira, tamba era agora ne’e era tecnologia digital, no modernu, tan ne’e buat hotu fasil ba ita, maibe la’os fasil. Ita sempre hasoru dezafius barak, maibe ita uza oportunidade hirak ne’e ho didiak, tamba dezafius hirak ne’e mak fo motivasaun ba ita atu nune’e labele rende ba dezafius sira ne’e, maibe halo ita arepende husi dezafius hirak ne’e nune’e bele hetan susesu”. Tenik Arca.
Liu husi Arca nia esperiensia hirak ne’e bele sai referênsia ba leitores sira liu-liu ba estudante sira ne’ebe buka matenek iha knua sabedoria ESG NKS Lospalos, atu bele tuir nia ain fatin, nu’udar estudante diak, potensial, inteligente, exemplar, ba kolega sira seluk, sai oan osan mean ba professores sira iha ninia eskola, inan-aman, maun no bin sira iha uma no iha públiku.
Liu husi meius ida ne’e nia hato’o mos ninia mensajem ba nia alin sira 10o ano no 11o ano atu esforsu-an hodi estuda maka’as, maski ita hetan dezafius oi-oin iha era globalizasaun ida ne’e, tamba estudantes sira nia dever mak estuda antes la’os estuda depois de ezame. Hakarak sai susesu iha futuru tenki aprende husi dezafius sira, tamba nia mak sai ita nia mestre no motivador ba vida estudante nian.
By Prof.EdoSantos’25
