Finalista Escola Secundária Geral Nino Konis Santana de Lospalos, sei nafatin iha pozisaun aas liu iha Municipio Lautém, kompara ho ESG no ESTV sira seluk ne’ebe existe. Komparasaun número partisipantes Ezame Nasional tinan ida ne’e menus uitoan duke tinan kotuk, maibe nafatin aas husi eskola sira seluk.
Tinan kotuk 2024, total partisipantes 487 estudantes, CT-177 estudantes, CSH-310 estudantes. Maibe tinan ida ne’e AE-2025, total partisipantes tun fali ba 443 estudantes, Mane 155 estudantes, Feto 288 estudantes. Programa CT-185 estudantes, Mane 40 estudantes, no Feto 145 estudantes; Programa CSH-258 estudantes, Mane 115 estudantes, Feto 143 estudantes.
Ezame Nacional 2025 ne’e hala’o durante loron haat, hahu husi dia 20 – 23 de outubro 2025, ho nia horario tuir mai: loron dahuluk, matematica (CT), ekonomia (CSH), ingles; loron daruak, Lingua Portuguesa, quimica (CT), História (CSH); loron datolu, Biologia + Fisica (CT), Sociologia + Geografia (CSH); loron dahaat, Dalen Tetum.
Ezame Lokal hala’o durante loron tolu husi dia 24-27 outubro 2025, ho nia orario tuir mai: loron dalima, Relijiaun no Sidadania; loron daneen, Geologia (CT), Temas de Literatura e Cultura (CSH); loron dahitu, Lingua Indonesia.
Ezame Nasional no Local ne’e la’o ho diak, iha situasaun ne’ebe hakmatek. Programa CT okupa sala 10, no CSH okupa sala 13, total hamutuk sala 23 ne’ebe sira uza hodi hala’o Ezame Nasional no Local. Failansu tinan ida ne’e husi parte vijilantes sira menus kompara ho tinan kotuk, tamba director no xefe examenador fo hanoin bebeik.
Durante realizasaun Ezame Nasional no Local ne’e hetan supervisaun husi Inspetur SME nian no nacional nian, alein de ne’e mos hetan segurança husi PNTL municipio Lautém.
Ezame Nasional no Local hotu, estudantes sira fila ba uma hodi hein rezultadu ne’ebe sei fo sai iha dia 2 de dezembro 2025 be sei mai. Ita espera katak, momentu fo sai rezultadu estudantes barak mak sei hetan susesu ou aprovado.
Nune’e sira bele hakat ba Nivel aas hanaran Universidade ou balun ne’ebe labele hakat ba universidade bele tuir formasaun ruma husi sentru formasaun sira ne’ebe SEFOPE hatudu tiha ona iha feira kareira nian iha Jinaziu antes exame.
Maski exame nacional no local mak hotu, maibe estuda nunka para, no exame moris nian sempre mosu bebeik iha ita nia vida, wainhira sei moris iha rai ida ne’e.
Pelo: prof. EdoSantos’25
