“Iha isin forte klamar mos forte”. Ne’e mak motto desportu ne’ebé baibain ita rona a nivel global. Realidade nune’e duni. Atu ita saudável iha isin no klamar, mak presiza mos fasilidade desportu ne’ebe suporta atividade desportiva ho diak, para ita nia isin saudável.
Fatin desportu sira ne’ebé iha ona aredor ESG NKS Lospalos ne’e, tuan ka bosan tiha ona, laiha orsamentu husi estadu atu rehabilitasaun, nune’e halo atleta sira mos atu joga isin baruk hela. Liu-liu kampu desportivu Basketball, Volleyball no Futsal iha eskola refere.
Grasas a Deus tamba iha ema laran diak ruma ne’ebe fo tulun ba ami nia ESG NKS Lospalos, ami simu ho liman rua. Liu-liu ba Grupu GEMBEL husi Arte Moris Dili, ne’ebe ho laran luak oferese sira nia tempu, energia no fasilidade, no mos hetan suporta fundus uitoan husi Kompainia Mie Sedaap Indonesia, nune’e sira ezekuta tiha iha terenu, no ikus mai ita haree kampu multifunsaun, basketball no futsal, iha fatin ida deit.
Grupu GEMBEL ne’ebe mai halo rehabilitasaun kampu basketball iha Munisipiu Lautém, liu-liu iha Lospalos vila mak hanesan, “Parokia S.Paulo Lospalos, EBC Centro Lospalos, Aldeia Titilari no ESG NKS Lospalos”. Kada kampu ho nia kustu U$600,00, mak grupu GEMBEL ne’e ezekuta iha fatin ha’at refere. Rehabilitasaun kampu multifunsaun iha ESG NKS Lospalos ne’e hala’o durante loron tolu, 14-16 novembro 2025.
Ikus mai, ami husi ESG NKS Lospalos, laiha buat ida atu selu imi nia kolen, tantu material no fundus husi Kompainia Mie Sedaap Indonesia, ami hato’o agradese wa’in, ba imi hotu nia ajudus hirak ne’e. Ami husu ba Na’i atu fo isin diak no saudável sempre ba imi hotu, nune’e Nia fo grasa wain ba imi hotu.
Eskritor: prof. EdoSantos’25
