Segunda-feira, 2 fevereiro 2026, tuku 8-8.30 dadersan, ESG NKS Lospalos realiza Isar Bandeira, primeira semana fulan fevereiro nian iha aredor da escola, Konselhu dos Professores hamutuk ho estudantes sira husi 10o ano to’o 12o ano.
Iha biban ne’e director da Escola hato’o nia intervensaun katak, eskola la’o tiha ona durante semana rua no tolu ona maibe estudantes balun sei feriadu hela seidauk tama eskola. Maibe eskola liu husi Lista Prezensa la’o nafatin, tamba ita la’o tuir rejimentu sai nu’udar ita nia mata dalan atu bele la’o tuir.
Ba Ano Escolar 2026, husi parte Kurikulu ita iha mudansa de karga horario, nebe uluk iha oras ida iha minutu 40, agora oras ida equivale ho 50 minutus, no intervalu dala rua atu bele dada iis uitoan, no sai iha tuku 2.30 (14.30), no iha sexta ne’e kondisional. Maibe se karik iha atividade desportu mak loron sexta-feira mos sai hanesan ho orario segunda-feira nian.Tenik tan.
Husu ba klase ida nebe monta tiha ona,ekipamentus eletronikus projetores no komputadores, atu xefe da turma ho nia diretores da turma tenki kuida no asegura didiak sasan hirak ne’e, tamba imi mak uza ba prosesu aprendizagem nian. Wainhira ita monta hotu ona teralis besi sasan hirak ne’e sei monta mantein permanente iha laran. Nune’e imi mak aproveita, tamba sasan eletronika ne’e suporta husi Ministeriu Edukasaun (ME) hodi ajuda imi iha prosesu aprendizagem nian.Tenik tan.
Ba 10o ano sira, tarde liu hatama imi nia diploma iha fulan marsu, se la hatama sei la tuir exame primeiru periodu nian. Ida ne’e la’os gabinete mak fo orientasaun maibe ne’e tuir orientasaun husi Miniteriu Edukasaun nasional nian. Tenik tan..
Eskola mos prepara ona sintina ba estudantes no professores atu bele uza, tamba ne’e bainhira uza karik tenki rega ho bee para mos nafatin, la’os mai uza fali professores sira nia sintina. Ba hirak ne’ebe atraza sei ba fase no rega sintina hirak ne’e. Tenik tan.
Husi 10o ano to’o 12o ano, monta ona white board, ne’e mudansa ida nebe antes ne’e ita sei uza blackboard no giz. Tan ne’e wainhira uza white board karik, labele uza spidol hodi hakerek fali apontamentos, se lae orsida spidol dos hira mos sei la to’o. Spidol ne’e nia funsaun atu mestre sira uza hodi halo explikasaun materia iha sala laran. Tenik tan.
Spesial ba 11o ano katak, iha ona farda kompletu maibe tamba sa mak imi uza la kompletu, balun uza gravata no balun la uza gravata, tamba ne’e depois de isar bandeira divisaun alunus sei halo cek point, para ita bele hatene ninia problema ne’e iha nebe, ba hirak nebe la uza gravata mai tuir isar bandeira iha aredor da eskola. La’os deit ba segunda-feira, maibe tenki uza lor-loron mai eskola husi segunda to’o kinta-feira. Nune’e mos kartaun tenki uza lor-loron mai eskola, aban ba leten eskola hahu cek point ba imi nia kartaun sira ne’e. Tenik tan.
Special ba 12o ano katak, imi la’o to’o ona iha nivel klase ida ne’ebe aas liu, laiha klase seluk nebe liu imi. Nune’e husu ba imi atu imi mos bele estuda aas liu tan, atu nune’e imi bele kompete ho eskola seluk, tantu eskola publiku no privadu sira iha exame nasional iha tinan ida ne’e. Hatudu ba eskola sira seluk katak, ESG NKS Lospalos mos bele, nusa mak sira seluk bele ita labele? Tamba ne’e husu ba imi atu bele estuda didiak, hodi prepara-an hasoru exame nasional hodi kompete ho eskola sira seluk. Tenik tan.
Ikus liu hato’o mos apresiasaun no agradesimentu ba 12o ano CT/D no 10o ano CT/D, nebe ohin sai responsável ba isar bandeira dadersan ida ne’e, maski iha erro uitoan maibe ita apresia nafatin, ho akompanhamentu husi professores sira. Nia salienta tan.
Depois de isar bandeira iha aredor da eskola kontinua kedas ho prosesu aprendizagem tuir ida-idak nia horario nebe trasa tiha ona husi eskola.
By prof.EdoSantos’26
