Iha loron segunda-feira, 23 Marsu 2026, iha salaun enkontru ESG NKS Lospalos, sub-KRAM ho PNTL halo atividade deziminasaun kona-ba lei arte marsiais no lei tranzitu ba estudante sira 10º to’o 12º ano. Atividade ne’e lidera husi Presidente sub-KRAM Sr. Kamilo Hornay ho nia ekipa.
Iha intervensaun, Sr. Kamilo Hornay hateten katak sub-KRAM estabelese husi tinan 2013 atu regula arte marsiais iha munisipiu Lautém.
Tuir mai, Komisariu sub-KRAM Edukasaun Sr. Caetano da Costa Ximenes esplika katak governu suspende grupu arte marsiais balu hanesan KORKA, PSHT no Kera Sakti durante fulan 6 tanba konflitu nebe akontese bebeik. Nia mos husu atu informa ba PNTL ka sub-KRAM se iha atividade ilegal.
Sr. Caetano mos hateten katak arte marsiais tenki uza ba objetivu diak hanesan hasa’e saúde no kompetisaun, la’ós atu halo violénsia. Nune’e mos, durante períodu suspensaun, atividade arte marsiais la bele hala’o no tenki tuir lei vigora.
Iha parte seluk, Sr. Sergio nu’udar jerasaun patriota hateten katak arte marsiais iha ligasaun ho krime ne’e mak kria KRAM atu bele regula ho diak, tan ne’e importante tebes atu halo edukasaun sivika ba joven sira atu diminui konflitu.
Husi PNTL, Sr. Olandino nu’udar xefe tranzitu esplika kona-ba lei estrada tuir dekretu no. 26, nebe regula movimentu iha dalan publiku. Nia hateten katak, ema nebe la tuir regra sei hetan koima ka multa. PNTL mos lembra katak asaun krime hotu-hotu sei responsabiliza tuir lei iha PNTL ka tribunal.
Ikus liu, Prof. Emiliano nu’udar representante Diretor no Adjunto hato’o agradesimentu ba Presidente Sr. Kamilo Hornay ho nia ekipa, sub-KRAM hamutuk ho PNTL, tanba sira nia kontribuisaun iha sensibilizasaun ne’e atu ajuda estudante sira evita krime no moris ho disiplina no responsabilidade, nune’e sira bele hetan future nebe diak.
By JPD, prof.EdoSantos’26
