Lospalos, 25 Marsu 2026 — ESG NKS Lospalos realiza Konferénsia Prévia (Pre-Bid Meeting) no atividade Site Visit entre Ministériu Ensinu Superior ho kompanhia konkorente sira, atu prepara projetu reabilitasaun infraestrutura eskola nian.
Diretor ESG NKS Lospalos, Sr. Énio Amaral Lopes, iha abertura eventu ne’e hato’o bemvindu no agradese ba delegasaun Ministériu Ensinu Superior no kompanhia sira tanba partisipa iha atividade ida ne’e. Nia mos sublinha katak konferénsia ne’e importante atu fó informasaun direta kona-ba prosesu no rezultadu ne’ebé sei atinji.
Xefe Departamentu Aprovisionamentu, Gestão no Kontratação Pública, Sr. Augosto Correia, esplika katak objetivu hosi konferénsia mak atu klarifika rekezitus ba kompanhia konkorente sira. Nia hatete katak iha total 22 kriteriu ne’ebé tenki prenxe hotu hodi bele sai vensedor ba projetu ne’e.
Projetu reabilitasaun ne’e envolve konstrusaun no melhoramentu sala tolu iha ESG NKS Lospalos, atu suporta abertura departamentu Hotelaria no Turismo iha tinan oin. Hanesan parte husi kriteriu prinsipál, kompanhia tenki iha fundu mínimu liu husi U$70.000 iha banku, tanba orsamentu projetu hamutuk U$63.000.
Relasiona ho kalendáriu prosesu, prazu submisaun proposta remata iha dia 30 Marsu 2026, abertura proposta sei realiza iha dia 2 Abril, no ajudikasaun kontratu planeia iha dia 16 Abril, antes asina kontratu iha dia 19 Abril 2026. Anunsiu públiku sei publika iha dia 26 Abril liu hosi kanal ofisiál governu nian.
Iha intervensaun seluk, Tékniku Ensinu Superior, Engenheiro Valerio de Oliveira, afirma katak kompanhia vensedor sei responsabiliza atu implementa projetu reabilitasaun inklui fasilidade sanitária no torre bee, ho prazu implementasaun durante fulan neen, tuir termu kontratu.
Depois de konferénsia, ekipa Ministériu Ensinu Superior ho kompanhia konkorente sira kontinua ho vizita direta ba fatin reabilitasaun sala de aula 6 iha ESG NKS Lospalos.
(Jornal Escolar/JPD – 2026), by prof.EdoSantos
