Loron Sábado, dia 20 dezembro 2025, iha salaun dos professores ESG NKS Lospalos, hala’o breefing daikus nian ho Konselu Professores kona ba atividade ensino aprendizajen hirak ne’ebe hala’o iha tinan ida nia laran, no mos hato’o informasaun balun ne’ebe importante.
Iha biban ida ne’e Diretor Eskola Mr. Énio Amaral Lopes hato’o katak, ba hirak ne’ebe seidauk manan BK (Bolsu Kandidatura) imi nia kontratu termina ona, maski seidauk iha Karta Despacho ou Sirkular ruma, maibe iha deit verbalmente katak, hapara kontratadu hotu no alunus la selu ona alias eskola gratuita. Tan ne’e ita tau naran tiha ona ho montante osan ida ne’e la’o nafatin mak ita haree, husu deskulpa deit tamba ita la’o uluk ona.
Ba hirak ne’ebe pasa ona BK hatudu imi nia attitude diak iha fatin foun serbisu nian. Ba karga horario iha ona Adjuntu mak sei fahe, pois ida-idak ba haree ninian.Hato’o feliz Natal 2025 no ano novo 2026 ba kolega sira hotu. Tenik tan.
Ikus liu director da Eskola akresenta tan katak, depois de ita tama fali ba Ano Eskolar 2026 nian, ita sei termina fatin ida atu halo refreshing antes hala’o ensino aprendizajen. Atividade orientasaun sira iha Ano Eskolar 2026 nian tenki iha planu no bazeia ba sirkular ne’ebe iha, labele halo tuir ita nia hakarak.
Iha parte seluk Adjunto Diretor Mr. Tomas da Costa Hornay mos hato’o nia interversaun katak, karga orario ida-idak bele foti depois de breefing ida ne’e. Foin dadaun nia ba tuir workshop ne’ebe koalia kona ba lei katak, ba futuru ba mai ida ne’ebe iha direitu atu hanorin iha Sekundáriu Jeral no Tekniku Vokasional mak hirak ne’ebe Lisensiatura (S1) no Mestradu (S2), ba D2 no D3 sira sei fila fali ba hanorin iha Ensino Básico.
Ba BK hirak ne’ebe manan, bazeia ba valor, wainhira valor hanesan karik fo uluk prioridade ba feto ou idade ne’ebe bo’ot liu, ba ida ne’ebe idade sei kiik, sei iha oportunidade seluk. Tenik tan.
Iha tinan escolar 2026 nian, eskola publiku hotu iha territoriu nasional sei hetan projector no laptop atu uza ba hanorin, tan ne’e husu ba professores sira ne’ebe seidauk hatene hakaas-an aprende no kaer ba, se mak sei lakoi uza sasan hirak ne’e estadu iha direitu atu hasai. No atu fo treinamentu ba sasan hirak ne’e, professor Multimedia sira ne’ebe foin dadaun ba tuir treinamentu mak sei fo iha tempu badak nialaran. Nia salienta tan.
Ba hirak ne’e karga orario la to’o sei kompleta iha ESTV ou EBC sira para kompleta 24 oras. Ita uza telemovel mos uza ho kuidadu, uza ho positivu hodi buka materia nebe relevante para atu hanorin estudantes sira, la’os atu haree buat aat iha laran, se lae lei sei kondena ita. Nia akresenta tan.
Iha parte seluk Xefi GAT Mr. Alsenio M. Pereira hato’o mos nia intervensaun katak, ita tenki hatene ita nia knar loloos nu’udar professor. Fo agradese ba kolega sira hotu ne’ebe ita serbisu hamutuk hodi lori ESG NKS Lospalos ba oin. Depois de breefing hotu professores sira ne’ebe sai diretores da turma no hetan knaar ba foti insentivu mina nian iha GAT nia fatin.
Depois de breefing professores sira ida-idak fila ba uma deskansa ka feriadu ba loron Natal no tinan foun nian, no sei tama fali iha dia 5 de janeiru 2026, hodi kontinua halo rejistrasaun ba alunus foun no tuan.
By prof. EdoSantos’25
