DISKURSU DIRETUR
ENSINU SEKUNDÁRIA JERÁL NINO KONIS SANTANA LOSPALOS
Obrigado ba Santissima Trindade Nia Protesaun ba ita no Obrigado ba Xefi Departamentu ICT husi SECOMS ho nia ekipa Ba dahuluk hakarak deseza hau nia apresiasaun ba ekipa Media SECOMS ho departementu
ICT ne’eb’é disponivel to’o mai iha ami nia Eskola hodi apoiu no kria plataforma website eskola no jornal parede dijital. Ami sente orgullu tamba pela primeira vez ami nia Eskola iha oportunidade hodi hetan apoiu direta hosi Media SECOMS ho departementu ICT. Ami kompromete katak ami nia estudante sira sei aproveita diak hodi aprende no esplora kuñesimentu no kreatividade hodi dezenvolve sira nia matenek liu husi plataforma website ne’ebé estabelese ona.
Ita hotu rekuñese katak Nasaun RDTL nudar nasaun Joven, no foin kompleta nia idade tinan 23 nudar nasaun soberana, independente no konsege tama ona iha era globalizasaun mundial no dijitalizadu. Estudante iha nivel Baziku, Ensinu Sekundáriu Jeral no Tekniku Vokasional iha kuñesimentu no abilidade ba área teknolojia avansadu, liu-liu iha era dijital tempu agora. Koalia kona-ba teknolojia dijital ne’ebé dinamiku tebes no mudansa neʼebé avansadu loron ba loron ho progresu no plataforma sira oioin hanesan google, facebook, whatshapp, instagram, e-mail no seluk-seluk tan. Ho plataforma sira ne’e ajuda tebes ita nia atividade lor-loron ho vantajen bo’ot ba estudante sira bele aprende buat barak husi internet ho google no youtube. Dezenvolvimentu teknolojia no dijitalizasaun ne’ebé lao avansadu liu no ita so azusta-an no laiha razaun hases-an husi realidade ida ne’e. Tamba ne’e ita tenke sai matenek iha kuñesimentu no abilidade ás hodi priense teknolojia dijital ho diak, matenek no oinsa atu uza ho responsabilidade.
Plataforma website eskola no jornal parede dijital nudar pasu importante ba estudante sira atu kadi matenek no kreatividade para fornese informasaun liu husi hakerek narasi tuir ida-idak nia talentu no simu informasaun ho fasil no lalais. Plataforma website eskola importante no fundamental tebes tamba bele sai hanesan fonte principal ba estudante no mós ba inan-aman no sosiedade atu akompaña informasaun neʼebé adekuadu ligadu ho progresu estudu no prosesu aprendizajen estudante sira iha eskola. Website eskola mós iha funsaun importante oinsa atu transmite informasaun ho adekuadu liga ba profile edukasaun no profile interna eskola inklui atividade relevante ne’ebé eskola trasa liu husi estratejia atividade periodikal no anual.
Website eskola mós permite ba estudante sira atu dezenvolve sira nia kreatividade ho fornesimentu narasi bazeia ba ideia no observasaun ba asuntu importante sira tantu ligadu ho aprendizajen no atividade estra kurikuler inklui eventu importante sira seluk ne’ebé eskola iha.
Nune’e mós ita nia atensaun ba Jornal Parede Dijital hanesan instrumentu ida atu fasilita estudante sira para dezenvolve sira ne’ebe iha kreatividade no abitua ho metodu hakerek narasi iha plataforma online no offline sira, tamba ne’e ezistensia jornal parede dijital bele fasilita no fó biban ba estudante sira hotu iha Ensinu Sekundáriu Jeral Nino Konis Santana Lospalos atu hatoman-an ho kreativu no inovativu, tanba ohin loron mudansa ba teknologia ita labele ses, maibé buka hatene kona-ba plataforma digital ne’ebé lori vantajen pozitivu no negativu ba utilizador sira. Jornal parede hanesan forma efisiente no asesivel husi komunikasaun vizual iha neʼebé permite para fahe informasaun kona-ba eventu importante ne’ebé eskola iha, atividade estra kurikuler no informasaun importante sira seluk.
Ikus liu hodi Konsellu Professores no Ajente eskola nia naran, permite ba ami atu agradese ba biban no tempu tomak husi ekipa Diresaun Nasional dezenvolvimentu Media SECOMS ho departementu ICT nia laran luak no apoiu tomak mai ami, iha ami nia eskola.
Obrigadu barak
