Lospalos, 25 novembro 2025
Estudantes Dili Institute of Technology (DIT) Departementu Mekanika Enjenering, hamutuk 68 pessoas, feto nain 4, restu mane hotu, hamutuk ho nia Dosentes nain 3, no Asistente Dosente nain 2, hala’o sira nia programa mai vizita Escola Secundaria Geral Nino Konis Santana Lospalos, iha loron Domingo, dia 23-25 novembro 2025, hodi hala’o camping iha arredor eskola, hodi experiensia ambiente eskola nian.
Iha loron tuir mai segunda-feira, dia 24 novembro 2025, formalmente DIT departementu Engenharia oferese Palco no Tenda ida ba eskola nu’udar sira nia agradesimentu no kolaborasaun amizade nian durante ne’e hamutuk ho ESG NKS Lospalos, tamba ida ne’e sira mai vizita ba dala rua nian. Primeiro husi Departementu IT nian mak mai fahe experiensia no halo promosaun kona ba DIT nian. Alein ida ne’e sira mos fo koinesimentu DIT nian ba estudantes no mestre sira iha eskola refere.
Iha momentu furak ida ne’e, Sr. Martinho do Carmo Santos, nu’udar representante Ensino Superior nian iha Munisipiu Lautem, deklara katak, nia papel iha ne’e atu kontrola ba universidade nia atividade sira mai iha munisipiu Lautem. Universidade sira iha kualidade hotu maibe iha programa ne’ebe diferente. Husu ba universidade nia representante sira atu mai fo asistensia ba nia estudante sira ne’ebe mai hala’o estajiu ka halo estudo iha eskola sira munisipiu karik. Imi nia atividade ne’e diak tamba sai experiensia ida ba imi, atu bele hetan futuru diak, hodi hetan rendimentu rasik husi ita nia liman rasik.
Alein ida ne’e mos Adjunto Diretor da Escola Sr.Tomas da Costa mos, fo bemvindu no agradece ba estudantes DIT hamutuk ho nia Dosentes no Asistente Dosente sira, ho ekipa tomak, ne’ebe mai iha eskola ida ne’e. Ida ne’e hanesan istoria ida, tamba foin pela primeira vez DIT oferese Tenda no Palku ba eskola atu utiliza tuir nesesidade. Atividade ne’e realiza tamba durante ne’e serbisu hamutuk ho DIT, no estudantes sira husi eskola ida ne’e barak mak kontinua sira nia estudu iha DIT, tan ne’e ekipa ida ne’e lidera husi alumni ESG NKS Lospalos.
Iha fatin seluk, Dosente Mekanika DIT, ne’ebe lidera ekipa ida ne’e mos informa katak, sira nia objetivu mai iha eskola ida ne’e, atu oferese ka entrega Palku no Tenda ba ESG NKS Lospalos, no mos fo koinesimentu DIT nian ba estudantes sira, atu sira keta hakarak kontinua ba DIT karik, hatene ona dalan. Nia informa mos katak, alumni sira husi eskola ida ne’e mos hetan valor diak iha DIT, tan ne’e wainhira feriadu ruma karik, bele ba vizita DIT nia fatin. Motiva estudantes finalista sira atu bele kontinua estudu iha universidade, liu-liu iha DIT hodi foti Mekanika Enjinering, tamba to’o agora feto menus liu, mane mak barak.
Atividade oferese Tenda no Palku husi DIT ba ESG NKS Lospalos ne’e partisipa husi estudantes sira husi 10o ano no 11o ano ne’ebe marka prezenja iha momentu ne’eba. Nune’e mos professores sira no estudantes DIT sira ne’ebe apresenta sira nia programa DIT nian ba estudantes sira.
Durante loron tolu kalan rua iha aredor eskola sira halo animasaun ba estudantes, mestre sira no komunidade sira ne’ebe hela besik iha ne’e. No ikus mai iha dia 25 novembro 2025 meudia sira despede fali ho ESG NKS Lospalos, no kontinua fali sira nia viajen ba Dili.
by Prof. EdoSantos’25
