Ekipa Sekretariadu UNTL Hala’o Promosaun Dijitalizasaun iha ESG NKS Lospalos

Lospalos, 11 Dezembro 2025

Ekipa Sekretariadu UNTL hala’o Promosaun kona ba Dijitalizasaun ba estudantes sira finalista AE-2025 (12^o ano), 10^o ano no 11^o ano iha sala de Aula Ciências Sociais Humanidade Turma F, ESG Nino Konis Santana Lospalos.

Team  Sekretariadu ne’e hamutuk nain 6 ne’ebe hala’o Sosializasaun ka Promosaun Dijitalizasaun ba estudantes sira ne’e, ho nia objetivu atu promove dijitalizasaun iha area ensino nian katak, “Teknolojia la subtitui professor, maibe ajuda professor hadia aprendizajen ba estudantes sira”.

Tan ne’e sira husu ba parte kompetente atu bele fo formasaun Komputador no Telefone IPhone ba professores sira, atu sira bele opera ka uza sasan hirak ne’e, hodi bele hanorin ba estudantes sira. Nune’e mos ba estudantes sira bele asesu iha fatin ne’ebe deit, iha tempu livre, hodi buka matenek ka siênsia iha Plataforma Online (google, youtube, zoom, WA, etc…).

Nune’e mos wainhira professores no estudantes tama hotu ona iha mundu dijitalizasaun, professor nia funsaun la’os atu hanorin ka ense matenek ba estudantes sira nia kakutak, maibe sira nia funsaun ajuda deit alunus sira atu aprende siensia no teknolojia, halo estudantes sira bele buka rasik no aprende rasik iha google, youtube, zoom, WA, hodi bele aumenta sira nia kapasidade, iha area siensia no teknolojia.

Iha parte administrasaun mos bele uja dijitalizasaun hodi fo sai konvite, avisu no mos bele halo registu alunus foun no tuan sira liu husi Plataforma Online (Dijitalizasaun). Nune’e professores ka sekretariadu la presiza print konvite bara-barak tan hodi fahe ba estudantes sira alias manual.

Maibe iha parte seluk mos ita sei hetan difikuldade barak hanesan, estudantes sira barak mak seidauk hatene computer nune’e mos professores balun seidauk hatene computer, rede internet iha eskola laiha, telephone IPhone mos, ba hirak ne’ebe nia inan aman iha posibilidade hola ba nia oan sira mak bele asesu.

Ekipa sira explika katak, wainhira tama iha UNTL buat hotu iha Plataforma Online, hahu husi Rejistu, Selu Eskola, Hare Valor, Trabalho sira hotu-hotu asesu liu husi Plataforma Oline (Dijitalizasaun). Tan ne’e husu ba estudantes sira, atu hahu agora kedas aprende komputador, oinsa uza word, excel no power point, inklui uza telephone IPhone, para bele asesu informasaun no material via online.

By Prof. EdoSantos’25