Aluno ho naran kompletu Agostinho de Castro, estudante finalista atual husi ESG NKS Lospalos, nu’udar estudante mane bonito ida ne’ebé matenek/intelijente iha ninia eskola, tuir atividade extrakurikular hanesan: corro iha eskola ba ba tuir içar bandeira nacional, eventu boot sira iha municipal, nune’e mos ba atividade iha igreja.
“Ha’u tenke esforsu-an hodi estuda atu bele hetan futuru ida nebe nabilan duke agora”. Tenik Agus
Agostinho de Castro, hanesan mane bonito ida husi Ponta Leste, Suco Raça, Postu Administrativu Lospalos. Oan husi Estanislau Pereira de Castro no Natalia Marques Cabral ne’e moris iha Raça iha loron 25 Outubro 2008.
Mane bonito ne’e ho naran naran estimada ka naran bolu “AGUS”, husi nia familia no kolega sira, agora dadauk sai estudante finalista husi eskola ESG Nino Konis Santana de Lospalos.
Nia moris husi familia ida ne’ebé nakonu ho domin, nia Pai ho Mãe hanorin prinsipiu moris nian, oinsa respeita ema seluk, oinsa ajuda pai no mãe sira iha uma, oinsa uja didi’ak tempu, no sempre agradese ba buat hotu ne’ebé iha, no sempre nonok deit hodi estuda, maski dala ruma nia kolega sira dada nia atu ba halimar, maibe nia konsistente nafatin hodi estuda materia hirak ne’ebe nia gosta no priense nia tempu livre sira hodi ajuda inan aman iha uma.
Oan mane ikun husi maun-alin nain sia (9) ne’e, moris husi familia ida ne’ebe simples no tau importansia maka’as ba edukasaun, wainhira Nia sei kiik hanesan labarik ne’ebé ativu los no kuriosu tebes, hodi hakarak hatene buat hotu-hotu, tan ne’e hahu nia estudu wainhira sei iha tinan lima (5).
Mane bonito ne’ebe nia mehi hakarak sai doutor ne’e, hahu nia estudu iha Ensino Básico 1o no 2o Ciclo, Adão Cristovão Larinassa de Raça Lospalos no termina iha tinan 2019. Tempo la’o nafatin nia kontinua ninia estudo iha Pré-Secundário ou Ensino Básico 3o Ciclo, no mantein iha eskola hanesan durante tinan tolu no termina iha tinan 2022, no hetan 1o classificado.
Tempu kontinua la’o nafatin, Nia hakat ba Ensino Secundário Geral Nino Konis Santana Lospalos iha tinan 2023, hodi hili Programa CT (Ciência Tecnologia) no oras ne’e dadaun nia sai finalista atu tuir Exame Nacional iha tinan 2025. Ho rezultado positivo ne’be nia hetan durante ne’e, sempre hetan primeiro lugar iha ninia turma laran, sai nu’udar pioneiro exemplar ba nia kolega sira seluk hodi tuir ninia ain fatin.
Nudar Pai no mãe ne’ebé sempre estima nia tamba oan ikun, sempre fó motivasaun no korajen ba Nia atu bele estuda no estuda nafatin to’o hetan susesu iha futuru ne’ebe diak. Husi rezultadu estudu ne’e mak nia hatudu iha eskola katak, hahú husi ensino básico mai to’o secundário sempre sai primeiro lugar, iha nia viajen estudu nian. Pai Mãe sempre fo motivasaun atu ba eskola tenke esforsu-an estuda maka’as, dixiplina, rona no respeita mestre mestra sira.
Mane bonito no kalma ne’e ho vontade bo’ot hakarak haklean nia kuñsimentu, nune’e nia kontinua nia estudu iha iha Eskola Secundária Geral (ESG) Nino Konis Santana Lospalos iha tinan 2023 to’o agora. Durante Eskola, Agus ho fitun Scorpio ne’e sempre hetan klasifikasaun diak no hetan premiu balun husi eskola.
Loron sempre muda ba kalan nu’udar prosesu aprendijazen ida ne’ebé Agus hasoru, dala ruma hetan valor diak, maibe dala ruma mos hetan valor la tuir nia hakarak, maibe nia sempre hetan motivasaun husi nia familia liu-liu nia Pai ho Mãe.
Nia nudar mane ikun husi maun-alin nain sia, Nia sempre hetan suporta no motivasaun husi ninia maun sira, ne’ebe fó apoiu materiál no spiritual balun ba nia atu bele kompleta nia nesesidade baziku no eskola nian. Durante hau sei iha Ensino Básico 6o ano hau tuir hela kursu Inglês iha Raça durante fulan neen, ne’ebe malae sira rasik mak loke.
Normalmente oan ikun ne’e ho manhozo, maibe ida ne’e la akontese ba nia, ho suporta familia nian, liu liu nia Mãe halo Agus konsege tuir atividade sira hanesan kooru eskola nian, igreja no organizasaun naun formal balun, tuir marcha iha eskola.
Agus ne’ebé hela iha Suco Raça Lospalos ne’e hamutuk ho nia familia rasik, dala ruma reprezentante eskola hodi tuir sertame nivel munisipál, no konsege hamorin Eskola ESG Nino Konis Santana Lospalos nia naran sai primeiro lugar.
Mane bonito ne’ebe ninia gostu futebol ne’e, lakohi lakon ho kolega sira iha estudo, tan ne’e materia hotu-hotu importante ba nia atu estuda, tamba iha interligadu no sai útil iha futuru be mai, tan ne’e nia la husik ida no kaer metin ida. Maibe ba nia materia hirak ne’e hotu-hotu importante, tan ne’e nia fahe tempu hodi estuda materia hirak ne’e, maske difisil maibe sempre koko no tenta nafatin atu estuda, nune’e nia rezultadu ikus sai primeiru lugar nafatin iha ninia turma.
“Liu husi atividade hirak ne’e ha’u aprende buat barak nebe bele aumenta hau iha koinesimentu kona moris liu-liu iha siensia ne’ebe ligadu ba moris aban bairua nian, hodi bele fo benefisu ba familia, nasaun no Kreda Timor Leste. Futuru sei sai nabilan ba hirak ne’ebe esforsu-an hodi estuda”. tenik Agus.
Liu husi Agus nia esperiensia hirak ne’e bele mos sai referênsia ba ema seluk liu-liu estudante sira, atu bele tuir nia ain fatin, nu’udar estudante diak, potensial, inteligente, exemplar, ba kolega sira seluk, sai oan osan mean ba professores sira iha ninia eskola, inan-aman sira iha uma no públiku.
Liu husi meius ida ne’e nia hato’o mos ninia mensajem ba nia alin sira 10o ano no 11o ano atu esforsu-an hodi estuda maka’as, disiplina atu nune’e bele atinji imi nia mehi ba futuru.
By Prof.EdoSantos’25
