Aluna ho naran kompletu Mecsia Julvania Paulo Lopes, estudante finalista atual husi ESG NKS Lospalos, nu’udar estudante feto bonita ida ne’ebé matenek/intelijente iha ninia eskola, tuir atividade extrakurikular hanesan: corro iha eskola tuir içar bandeira nacional, eventu boot sira iha municipal, nune’e mos ba atividade iha igreja.
“Ha’u tenke esforsu-an hodi estuda husi experiensia tamba experiensia mak professor diak ida atu ita aprende ho nia, nune’e ota bele hetan futuru ida nabilan duke agora”. Tenik Mecsia
Mecsia Julvania Paulo Lopes, hanesan feto bonita ida husi Ponta Leste, Suco Serelau, Postu Administrativu Lautém. Oan husi Moises Almeida Santos no Anita Lopes ne’e, moris iha Serelau, loron 6 fulan maio tinan 2007.
Feto bonita ne’e ho naran naran estimada ka naran bolu “Mecsia”, husi nia familia no kolega sira, agora dadauk sai estudante finalista husi eskola ESG Nino Konis Santana de Lospalos.
Nia moris husi familia ida ne’ebé nakonu ho domin, nia Pai ho Mãe hanorin prinsipiu moris nian, oinsa respeita ema seluk, oinsa ajuda pai no mãe sira iha uma, oinsa uja didi’ak tempu, no sempre agradese ba buat hotu ne’ebé iha, no sempre nonok deit hodi estuda, maski dala ruma nia kolega sira tenta nia atu ba halimar, maibe nia konsistente nafatin hodi estuda materia hirak ne’ebe nia gosta no priense nia tempu livre sira hodi ajuda inan aman iha uma.
Oan feto ikun husi bin-alin nain lima (5) ne’e, moris husi familia ida ne’ebe simples no tau importansia maka’as ba edukasaun, wainhira Nia sei kiik hanesan labarik ne’ebé ativu los no kuriosu tebes, hodi hakarak hatene buat hotu-hotu, tan ne’e hahu nia estudu wainhira sei iha tinan lima (5) kedas.
Feto bonita ne’ebe nia mehi hakarak sai doutor ne’e, hahu nia estudu iha Ensino Básico Filial 1o no 2o Ciclo, Serelau, Lautém no termina iha tinan 2019. Tempo la’o nafatin nia kontinua ninia estudo iha Pré-Secundário/Ensino Básico Central 3o Ciclo Leusari, no mantein iha eskola hanesan durante tinan tolu no termina iha tinan 2022, no hetan 1o classificado.
Tempu kontinua la’o nafatin, Nia hakat ba Ensino Secundário Geral Nino Konis Santana Lospalos iha tinan 2023, hodi hili Programa CT (Ciência Tecnologia) no oras ne’e dadaun nia sai finalista hodi tuir Exame Nacional iha tinan 2025. Ho rezultadu positivo ne’be nia hetan durante ne’e, sempre hetan primeiro lugar iha ninia turma laran, sai nu’udar pioneiro exemplar ba nia kolega sira seluk hodi tuir ninia ain fatin, nune’e Nia tama iha turma primeiro klasifikadu nian.
Nudar Pai no mãe ne’ebé sempre estima nia tamba oan ikun, sempre fó motivasaun no korajen ba Nia atu bele estuda no estuda nafatin to’o hetan susesu iha futuru ne’ebe diak. Husi rezultadu estudu ne’e mak nia hatudu iha eskola katak, hahú husi Ensino Básico mai to’o Secundário sempre sai primeiro lugar, iha nia viajen estudu nian. Pai Mãe sempre fo motivasaun atu ba eskola tenke esforsu-an estuda maka’as, dixiplina, rona no respeita mestre mestra sira.
Feto bonita no kalma ne’e ho vontade bo’ot hakarak haklean nia kuñsimentu, nune’e nia kontinua nia estudu iha iha Eskola Secundária Geral (ESG) Nino Konis Santana Lospalos iha tinan 2023 to’o agora. Durante Eskola, Mecsia ho zodiak Taurus ne’e sempre hetan klasifikasaun diak no hetan premiu balun husi eskola.
Loron sempre muda ba kalan nu’udar prosesu aprendijazen ida ne’ebé Mecsia hasoru, dala ruma hetan valor diak, maibe dala ruma mos hetan valor la tuir nia hakarak, maibe nia sempre hetan motivasaun husi nia familia liu-liu nia Pai ho Mãe. Nia pai sempre fo motivasaun katak, ba eskola karik tenki estuda didiak no labele halo tuir ema riku sira nia hahalok hodi haluha-an, maibe tenki haraik-an tamba ita ema kiak.
Nia nudar feto ikun husi bin-alin nain lima, Nia sempre hetan suporta no motivasaun husi ninia bin sira, ne’ebe fó apoiu materiál no spiritual balun ba nia atu bele kompleta nia nesesidade baziku no eskola nian. Durante nia sei iha Ensino Básico 3o Ciclo nia tuir hela kursu Inglês Básico iha SOLS durante fulan neen.
Normalmente oan ikun ne’e ho manhozo, maibe ida ne’e la akontese ba nia, ho suporta familia nian, liu liu nia Mãe halo Mecsia konsege tuir atividade sira hanesan kooru eskola nian, igreja no organizasaun naun formal balun, tuir marcha iha eskola.
Mecsia ne’ebé hela iha Ira-ara (PLN), Suco Fuiloro, Lospalos ne’e hamutuk ho nia familia rasik, dala ruma reprezentante eskola hodi tuir sertame nivel munisipál, no konsege hamorin Eskola ESG Nino Konis Santana Lospalos nia naran sai primeiro lugar.
Feto bonita ne’ebe ninia gostu rona música ne’e, lakohi lakon ho kolega sira iha estudo, tan ne’e materia hotu-hotu importante ba nia atu estuda, tamba iha interligadu no sai útil iha future be mai, tan ne’e nia la husik ida no kaer metin ida. Maibe ba nia materia hirak ne’e hotu-hotu importante, tan ne’e nia fahe tempu hodi estuda materia hirak ne’e, maske difisil maibe sempre koko no tenta nafatin atu estuda, nune’e nia rezultadu ikus sai primeiru lugar nafatin iha ninia turma preimeru klasifikadu nian.
“Liu husi atividade hirak ne’e ha’u aprende buat barak nebe bele aumenta hau iha koinesimentu kona moris liu-liu iha siensia ne’ebe interligadu ba moris aban bairua nian, hodi bele fo benefisu ba familia, nasaun no Kreda Timor Leste. Futuru sei sai nabilan ba hirak ne’ebe esforsu-an hodi estuda liu husi experiensia, tamba experiensia mak sai ita nia mestre”. Tenik Mecsia.
Liu husi Mecsia nia esperiensia hirak ne’e bele mos sai referênsia ba ema seluk liu-liu estudante sira, atu bele tuir nia ain fatin, nu’udar estudante diak, feto potensial, inteligente, exemplar, ba kolega sira seluk, sai oan osan mean ba professores sira iha ninia eskola, inan-aman sira iha uma no iha públiku.
Liu husi meius ida ne’e nia hato’o mos ninia mensajem ba nia alin sira 10o ano no 11o ano atu esforsu-an hodi estuda maka’as, liu husi experiensia, tamba experiensia mak sai nu’udar mestre bo’ot ida ba ita estudante sira, hodi disiplina atu estuda, nune’e bele atinji imi nia mehi iha futuru.
By Prof.EdoSantos’25
