Konselu Estudantes ou iha lian Indonesia katak OSIS (Organisasi Siswa Intra Sekolah), ou Organizasaun Estudante Interna Eskola (OEIE) hala’o Hand Over husi Estrutura tuan ba Estrutura foun, hafoin hala’o Isar Bandeira Nasional ikus iha resintu aredor Eskola Nino Konis Santana Lospalos, dia 6 de outubro de 2025.
Iha momento ne’e, Gabinete Diretiva ne’ebe nu’udar Ispetur Isar Bandeira nian, fo obrigadu ba estrutura tuan ne’ebe hala’o ona ninia serbisu durante tinan ida husi fim de 2024 mai to’o iha fim ano escolar 2025, no mos fo motivasaun ba estrutura foun atu bele ezekuta didiak no hala’o ninia kna’ar nu’udar Konselu Estudante, sai ezemplar ba nia elementus sira, atu sira mos bele tuir no suporta programa hirak ne’ebe imi trasa tiha ona, hodi hala’o durante tinan ida, konforme imi nia mandatu termina, hodi entrega fali ba imi nia alin sira.
Iha biban ne’e Xefe Konselu Estudantes Florentino dos Santos (AL.2024-2025), entrega simbolicamente documento no estrutura tuan nian ba estrutura foun, atu bele ezekuta no hala’o tuir programa hirak ne’ebe hato’o tiha ona iha kada sala de aula, antes hala’o votasaun, atu nune’e ita nia eskola Nino Konis Santana mos bele sai exemplar ba eskola sira seluk.
Iha fatin seluk Xefe Konselu Estudantes foun Alexandre Herung (AL.2025-2026) mos simu knar ida ne’e ho responsabilidade, no promote atu ezekuta tuir programa hirak ne’ebe sira hato’o iha kada sala de aula durante tinan ida, mak hanesan: halo lixeiru iha kada sala de aula, hala’o atividade extrakurikular sira iha tempu loraik, wainhira eskola termina, no sira seluk tan.
Tuir rejimentu eskola katak, Konselu Estudante ou Organizasaun Estudante Interna Eskola (OEIE) nia papel mak atu ajuda mestre mestra sira, no tau matan ba nia kolega sira durante sei iha ambiente eskola ka oras eskola, tuir orientasaunu husi divisaunu alunos nian.
Alunu/a ruma ne’ebe kontra ou la kumpri rejimentu refere sei hetan sansaun husi parte hotu-hotu ne’ebe iha relasaun ho knar ida ne’e mak; Diretor Eskola, Diretor Adjunto, Xefe GAT, Professor/a Dixiplina, Diretor da Turma, Divisaun Alunos, Divisaun Konselor, Funsionariu Eskola no Seguransa Eskola.
Tan ne’e, ho kna’ar hirak ne’ebe temi ona iha Regulamentu Interna Eskola (RIE) nian, Konselu Estudante tenki estuda no hatene ninia lalaok hodi aplika ba ninia-an rasik sai exemplar ba sira seluk, no responsavel ba attitude nia kolega sira ne’ebe la tuir RIE nian, durante hala’o prosesu aprendizagem iha eskola Nino Konis Santana Lospalos.
By prof. EdoSantos’25
