Literasia Basiku bagi hirak nebe foun ou inisiasaun hakarak estuda hakerek ou foin mak hakarak atu tama ba mundu literasia, tenki hatene eskrita baziku atu ita nia eskrita bele atrai ema seluk nia atensaun hodi leh. Alien ida ne’e mos, ita mos bele fahe experiensia saida deit, ita fahe iha forma eskrita atu ema seluk bele hatene, saida mak ita senti, halo no hetan, nune’e mos atrai sira sai eskritor, no tuir ita nia mundu literasia.
Tuir eskritor koinesidu Indonesia, Cahyadi Takariawan katak, “Se hakarak sai ekritor, hahu hakerek. Lalika hanoin tan. Senti deit. Hakerek nafatin, lalika tauk sala, no lalika para hakerek tamba hakarak halo editan eskrita. Husik ba deit se karik ita hakerek sala, typo, pontuasaun nebe sala. Ita boot lalika halo koresaun”.
Ba ita-boot sira nebe baibain hakerek ona, tuir mai ne’e iha meius pratikas no fasil liu atu hahu hakerek eskrita ruma.
Leh bismilah (islam/muslim), reza husu espiritu santu nia prezensa (Kristaun Katolika). Loke Laptop. Hahu hakerek. Lalika hanoin tan. Senti deit. Hakerek nafatin, lalika tauk sala, no lalika para hakerek tamba hakarak halo edisaun eskrita.
Husik deit se karik ita hakerek sala, typo, pontuasaun sala. Lalika halo koresaun. Hakerek nafatin to’o hotu buat hotu nebe o hakarak hakerek. Hafoin hakerek hotu, intervalu uitoan, hafoin hahu leh fila fali hodi hadia eskrita no halo edisaun nebe presiza. Ikus mai sai eskrita ida.
Hafoin, saida mak o hakarak hakerek? Tamba nia objetivu mak hahu estuda oinsa hakerek, nune’e hakerek saida deit nebe liu husi ita nia fuan ou memoria, ou buat hirak nebe fasil atu hakerek.
Tuir mai ida iha maneira 10 nebe fasil liu atu ita-boot sira bele hakerek, hanesan treinu hakerek lais:
- Hakerek Ita-Boot Nia Atividade Horseik
Hanoin fila fali, horseik ita-boot hahu hader ba halo atividade to’o ba toba fali, halo atividade saida deit? Hakerek hotu. Lalika hanoin fali nia sistematika. Hakerek deit.
- Hakerek Ita-Boot Nia Planu Atividade Aban Nian
Aban dadersan ita-boot sei halo atividade saida deit? Hahu hader ba halo atividade to’o ba toba fali, halo atividade saida deit? Hakerek hotu. Lalika hanoin fali nia sistematika. Hakerek deit.
- Leh Livru Ida, Hakerek Nia Rezumu
Foti livru ida iha o nia uma, saida deit, nebe atrai ita-boot. Leh hotu ou parte balun deit nebe ita boot ohin leh. Hakerek deit. Lalika hanoin fali nia sistematika. Importante, hakerek deit.
- Leh Artigu Ida, Hakerek fila fali Nia Konteudu
Leh revista, jornal, tabloides ou blog/website. Hili artigu ida nebe atrai ita boot. Hakerek fila fali konteudu artigu ne’e hodi ita-boot nia estilu rasik. Hakerek deit. Lalika hanoin fali nia sistematika. Importante, hakerek deit.
- Tuir Forum, Hakerek Nia Materia
Marka Prezensa iha masjid (muslim), iha igreja (katolika) nebe besik o nia uma. Tuir palestra kronika ou resitasaun iha meskita (muslim), sermaun/omilia semanal iha igreja (kristaun katolika). Rona ho seriu. Hafoin fila ba uma, hakerek saida mak rona husi sermaun/omilia ne’e. Hakerek deit. Lalika hanoin fali nia sistematika. Importante, hakerek deit.
- Rona Istoria, Hakerek Fila Fali
Husu o nia laen/feen/oan/kolega hodi konta istoria ba saida deit. Hakerek istoria ne’e hodi o nia liafuan rasik. Hakerek deit. Lalika hanoin fali nia sistematika. Importante, hakerek deit.
- Haree Film, Hakerek Nia Istoria
Haree film ida iha TV ou bioskop. Atensaun nia istoria. Hafoin hakerek fila fali konteudu film ne’e hodi o nia liafuan rasik. Hakerek deit. Lalika hanoin fali nia sistematika. Importante, hakerek deit.
- Hakerek Ita-Boot Nia Biografia ou Ita-Boot Nia Familia
Se ita-boot iha oan balun, hanoin fali o nia oan ikun nia biografia. Hafoin hakerek nia biografia husi moris to’o ohin loron. Ita-boot bele konta fila fali o nia biografia rasik ou ema hirak nebe besik ita-boot. Hakerek deit. Lalika hanoin fali nia sistematika. Importante, hakerek deit.
- Hakerek Ita-Boot Nia Istoria Hasoru Malu Dahuluk Ho O Nia Parseiru
Ba hirak nebe kabenain, Ita-Boot hanoin fali iha nebe no oinsa mak ita-boot hasoru malu dahuluk ho o nia parseiru? Hakerek momentu furak ne’e. Ba hirak nebe sei jomblo, se Na’i fo kandidatu parseiru moris, ita-boot hakarak hasoru iha nebe ba dala uluk, no iha kondisaun saida deit? Hakerek deit. Lalika hanoin fali nia sistematika. Importante, hakerek deit.
- Hakerek Ita-Boot Nia Difikuldade Iha Eskrita
To’o ohin loron ita-boot sei nafatin la hatene hakerek buat ruma? Tenta konta took ba hau o nia difikuldade iha eskrita. Hakerek deit. Lalika hanoin fali nia sistematika. Importante, hakerek deit.
Konkluzaun:
Se karik ita-boot hakarak sai eskritor iha loron ida, mak hahu ona hakerek husi ohin, hakerek kona ba saida deit, husi saida deit mak o rona, haree, no senti, ne’e mak sai ita-boot nia materia atu hakerek, ho forma “artigu, poesia, novela”, ou saida deit, importante mak hakerek deit, loron ida sei sai útil ba hirak nebe presiza.
Espera katak, ho maneira simples ida ne’e, ba ita-boot nu’udar eskritor inisial, hahu o nia obra hodi tuir maneira simples nebe esplika ona iha leten (refere). Espera katak ita-boot sei hetan susesu, no loron ida ita-boot sei sai eskritor koiñesidu ida iha mundu.
Tamba tuir eskritor Indonesia Pramudya Ananta Tur katak, “Ema bele matenek to’o lalehan aas ba, maibe durante moris nia la hakerek, nia sei lakon iha sivilizasaun no istoria. Hakerek mak nu’udar obra ba eternidade”.
Ho artigu badak kona ba eskritor inisiasaun ne’e, bele atrai imi hodi hakerek buat ruma, para ita bele publika iha ita nia pagina website ESG NKS Lospalos, ne’ebe ita hotu hadomi.
By prof. EdoSantos’25
referensia furak…parabens ba hakerek nain
agradece…ba leitores sira…sei motiva halo hau bele hakerek diak liu tan.