Juventude Lorico Aswain
O nia aten brani
Hasoru ivasor Indonesia
Ne’ebe mai invade o nia rai
Rai ida ne’ebe terus kleur ona
Tan deit invasores sira nia hahalok
Haterus povu rai nain Timor Leste
Nebe sempre halerik ba Independênsia
Luta Timor Leste
Subar hela iha kalilin invasor
Hodi habosok mundu katak
Timor Leste laiha funu
Loron 12 de novembro 1991
Loron ida ne’ebe juventude loriku aswain
Hakilar ba mundu internasional katak
Maubere oan sira halerik hela iha nia rai rasik
Rai na’in matebian sira hatene
Proteje jornalista Maxstall
Hodi fo sai ba mundu internasional
Massacre kruel husi invasor Indonesia
Invasor ida ne’ebé laiha sentimentu
Sein humanidade
Trai nafatin povu maubere nia direitu
Ne’ebé hakarak independensia
Loron ida ne’eba
Juventude sira hamutuk ho rai nain matebian sira
Hakilar ba mundu katak
Invasor Indonesia kontra Direitus Humanus
Iha rai lulik no rai santa Timor Leste
Ohin ami selebra ona 34 anos ona
Ho lema “Hau Timor Oan Orgulho ho Hau Nia Nasaun”
Hodi relembra o nia aten brani
Ba rai doben Timor Leste
Hatudu ba juventude sira ohin loron
Atu orgulhu nafatin sai nasaun independente
Atu kontinua luta nafatin ba rai ida ne’e
Hodi halo dezenvolvimentu nasional
By prof. EdoSantos’25
