Iha loron sexta-feira, dia 13 de fevereiro 2026, tuku 9.00 to’o tuku 10.30 dadersan, ESG NKS Lospalos, realiza Missa Abertura Ano Escolar foun 2026, iha Igreja S.Paulo Lospalos, ne’ebé dirigi husi Diretor da Casa Salesiano, Amo Justiniano de Sousa,SDB ho koselebrante Diacono Jose Fernandes,SDB.
Misa ne’e partisipa husi Konselu Professores, no funsionarius sira, hamutuk ho estudantes sira hotu husi 10o ano to’o 12o ano, ne’ebe mak tuir prosesu aprendizagem iha Escola Secundária Geral Nino Konis Santana Lospalos. Kooru responsabiliza husi representante estudantes sira husi 10o ano to’o 12o ano, akompanha husi professores sira.
Iha nia homilia kooselebrante Dc.Jose Fernandes,SDB, fo sai historia interesante ida ba estudantes sira kona ba domin nian. Leitura sira apresenta mai ita imajen 2 mak, iha primeira leitura kona ba povu sira fahe malu (divisão dos povos). Fahe malu tamba lakoi halo tuir Maromak nia liafuan. Iha segunda mak Evangelho S.Marcos fo hanoin mai ita katak, Jesus fo isin diak ba diuk no ema monok.
Hanesan historia nebe ohin dehan mai ita katak, ita iha moras oi-oin. Moras ne’e mai husi ita nia-an rasik. Buat barak mak mai husi ita nia laran, la’os husi liur mak tama, ita mak kria ba ita-an rasik. Saida mak ita foti husi imajen rua ne’e: 1) povu sira fahe malu. Ita nu’udar estudante nu’udar trabalhador, problema boot nebe ita hasoru iha ita nia moris mak divisaun (fahe malu).
Husi Konis ka husi Lere. Nusa mak o lakoi ba eskola iha Lere? Tamba Lere ne’e iha foho no Konis ne’e iha Kota/vila. Ita kria ita nia hanoin kona ba divizaun. Eskola rua ne’e iha hotu vila. Nune’e mos imi balun mai husi Raça, balun mai husi Iliomar, Luro no fatin selu-seluk tan…Divisaun hirak ne’e hatudu mai ita katak, ita la rona Maromak nia futar lia. Katak Jesus mak bele kura divisaun hirak ne’e sai fali uniaun ida deit. Tan ne’e ita hotu tenki fila fali ba Kristu, tamba Nia deit mak bele halo ita sai ida deit (uniaun).
Ita nu’udar estudante labele egoista, katak hau nian deit mak loos, hau nian deit mak diak (arogante) katak foti-an. Hau lakoi besik ba ida neba tamba nia valor mean tolu, hau nian ida deit. Jesus konvida ita atu loke-an (efata) katak loke ba, loke o nia matan, o nia fuan hodi rona no hare Maromak, hodi hadomi malu.
Ita nu’udar estudante atu sai servidor ba nasaun nian ou servi ema seluk. Ohin Maromak nia futar lia dehan mai ita katak, laos ita mak diuk ka monok, maibe ita dala barak monu ba diuk no monok fuan nian, hodi lakoi koalia ho ema seluk, maski fizikamente ita diak hela. Parte moral no fuan nian ita monok. Jesus konvida ita atu fila ba Nia, nu’udar moras ida nebe presiza doutor. Se ita hakarak sai diak labele halai mesak deit, maibe tenke buka, katak wainhira ita dere odamatan, odamatan sei nakloke. Buka ba mak ita sei hetan.
Se o hakarak sai matenek iha buat 3 nebe o tenki halo. 1) iha Maromak nia futar oin hau ne’e kbiit laek. Matenek nebe hau iha la’os tamba estuda, maibe ne’e presente ida husi Maromak. Maski estuda loron kalan hela deit, maibe Maromak la fo vontade ida nebe diak, la fo mai ita fuan nebe moos, la fo mai ita tempu nebe diak, estuda mos ita la komprende buat ida. Tan ne’e ita presiza fila ba Nia hodi husu Nia grasa.
2) Ita tenki haraik-an, atu husu instrumentu Maromak nian atu bele tau matan mai ita, mak Professor sira. Sira hanorin ita buat nebe loos tamba Maromak nia grasa. Sira tenki hanorin buat diak sira mai ita, la’os hanorin fli buat aat mai ita. Tamba sira hetan grasa special husi Maromak nu’udar Professor, atu bele hanorin ita. Tan ne’e ita tenki haraik-an atu simu sira nia materia, no hakbesik-an hodi husu sira.
3) Entre estudante sira, ita mos tenki haraik-an ba ita nia maluk sira, liu-liu hirak nebe hatene uitoan liu ita, komprende diak liu, ita buka atu husu sira.
Se buat nebe Maromak mak tau hamutuk ka harii, nia sei la monu to’o laiha rohan. Nune’e mos se eskola ida ne’e mak uluk hetan inspirasaun husi Maromak ka Espiritu Santu, eskola ida ne’e sei la taka no sei kontinua la’o nafatin. Maibe atu labele taka, ita hirak nebe eskola iha neba ida-idak tenki kontribui ba eskola ida ne’e nia diak, agora no ba future, hodi hamorin nia naran.
Iha parte seluk, Diretor da Eskola Sr.Énio Amaral Lopes, hato’o mos agradecimento ba Amo selebrante no Diaconu nebe ohin fo homilia furak, hodi fanu fali estudantes no professores sira. Eskola hamutuk ho Konselu dos Professores hamutuk ho estudantes sira, ho objetivu atu mai husu grasa no bensaun Nai Maromak nian. Iha misa ida ne’e atu husu espiritu matenek nian ba ita nia estudantes no professores sira atu bele halao prosesu ensino apredizagem iha tinan ida ne’e bele la’o ho diak.
Nia mos hato’o agradecimentu especial ba professores hirak ne’ebe ajuda hodi hanorin kanta ba ita nia estudantes sira hodi bele kanta diak. Liu-liu profa Tere, Ibu Agus, ibu Marry, Ibu Sisca, no organista Mr.Emiliano nebe esforsu-an hodi akompanha ita nia estudante sira, nune’e ohin bele kanta diak no furak. No mos ba estudantes hirak nebe fo nia tempu atu aprende kantigu sira, ikus mai ita hetan rezultadu nebe kapaas no furak.
Iha parte ikus, amo director da casa salesiano Amo Justiniano de Sousa, SDB mos, hato’o ninia opiniaun balun katak, estudantes sira tenki estuda didiak, sai edukadu, labele sai fali mal edukadu, hodi tuir deit arte marsiais sira hodi kria deit problema. Atividade sira hanesan ne’e diak, tamba diretor ho nia konselu professores sira iha inisiativa hodi mai husu Maromak nia grasa no bensa, atu bele sai estudante nebe diak, no professores ka funsionariu nebe diak, hodi foti heroi boot Nino Konis Santana nia naran. Nune’e nia mos sente kontenti iha lalehan neba.
Misa termina iha oras tuku 10.30 dadersan, estudante sira hala’o absensi molok sira fila ba ida-idak nia uma. No loron tuir mai dia 14 mak sei realiza loron domin nian iha ambiente eskola nian.
By Mr.EdoSantos’26
