Lospalos, 19 outubro 2025
Finalistas sira husi ESG NKS, LAT, CAFE, ESTV no EBC balun, hamutuk hala’o Novena durante loron sia husi dia 11-19 outubro 2025, tutuir malu antes hasoru Exame Nacional & Local AE-2025, iha gruta Nossa Senhora de Graça Laruara.
Novena ida ne’e hala’o tuir motto popular ne’ebe dehan katak, “Ora et Labora” ou Reza no Estuda/Serbisu, sempre la’o hamutuk, atu nune’e wainhira estudantes sira hetan difikuldade iha sira nia estudu karik bele hetan naroman husi Espiritu Santu, hodi hatudu dalan, leno sira nia neon, nune’e sira bele resposta pontus Exame Nacional no Local ne’e ho diak, nebe sira hala’o iha dia 20-27 de outubro 2025, iha ida-idak nia eskola.
Novena ida ne’e diriji husi nia professor Emilio Santos, ne’ebe sai pioneiro ba Novena ida ne’e. Loron primeiro nia mak diriji hodi fo exemplo, pois loron tuir mai estudantes sira husi ESG NKS no LAT mak troka malu hodi harohan, tuir ida-idak nia intensaun katak, atu susesu iha exame nacional 2025 nian.
Total estudantes sira ne’ebe tuir novena ida ne’e, mais ou menus 150 estudantes finalistas liu, husi Ensino Secundário Geral Konis, Lere, Tecnico Vocasional, no EBC balun ne’ebe hela iha aredor sidade Lospalos, mak representa nia maluk sira husi kada eskola sira refere.
Balun hela dook mos mai tuir, tamba fiar katak, liu husi novena ida ne’e sira sei hetan susesu iha exame nacional, nu’udar D.Bosco haktuir katak, “se mak fiar iha Nai Feto, nia sei hetan milagre”. Sira ne’ebe dook mai tuir novena mak husi Raça, Home, nsst…
Ba hirak ne’ebe relijiaun seluk iha novena ne’e nia laran, mak sira harohan hotu ba nia maluk sira ne’e atu sira mos bele hetan grasa ne’ebe sira hetan iha novena ida ne’e.
Novena ne’e hahu iha oras tuku 6 loraik, lor-loron tutuir malu la kotu to’o besik exame nacional mak foin para. Maibe sira ne’ebe iha devosaun ba Na’i Feto mak mai tuir antes novena hahu iha ona fatin, maibe balun ne’ebe naran katak tuir laiha devosaun, sempre mai atraza, no balun liu ona loron ida rua mak foin mak mai, tan ne’e sira tuir inkompletu.
Ora et Labora liu husi orasaun simples novena ida ne’e, tinan-tinan sempre hala’o iha fatin gruta hanesan, ho rezultadu 100% passa ba hirak ne’ebe mai tuir novena ida ne’e ho devosaun. Tamba novena ne’e hala’o iha fulan Nossa Senhora, fulan Rosario nian, tan ne’e sira hetan grasa espesial ida ne’e ho gratuitamente.
Eskritor: prof. EdoSantos’25
