Lospalos, 12 Dezembro 2025
Iha loron sexta-feira, dia 12 dezembro 2025, Gabinete Diretiva ESG NKS Lospalos, hala’o serimonia sorumutu ho Inan-Aman estudantes sira nian, hodi fahe informasaun ba sira, molok fahe kaderneta passajem da klasse nian ba sira.
Diretor Eskola Sr.Énio Amaral Lopes, iha nia intervensaun koalia kona ba, attitude, karakter, situasaun aprendizazen estudante sira nian durante Tinan Eskolar 2025 nian. Nia mos relata katak, iha tinan ida ne’e ESG NKS Lospalos hetan alokasaun professor foun nain 10 husi Ministeriu Edukasaun, maibe material balun mos sei menus, tan ne’e ita sei presiza kontratu tan professor balun. Nune’e mos informa ba inan aman sira kona ba uza osan konsensoens hodi halo rehabilitasaun ba sala Teknolojia Multimedia no sala de aula 12o ano nian balun.
Iha parte seluk Adjunto Diretor Sr.Tomas da Costa, koalia mos kona ba kurrikulum nian, no mos fo sai rezultadu passajem nian no mos melhor klasifikadu nian. Rezultadu mak hanesan tuir mai ne’e: Ba 10o ano ho total 418 alunos, hetan aprovado 410 alunos ou 98.08% no reprovado 8 alunos ou 1,91%. Ba 11o ano ho total 420 alunos, hetan aprovado 416 alunos ou 99.04% no reprovado 4 alunos ou 0,95%. Nune’e total jeral hamutuk 838 alunos, aprovado 826 alunos ou 98,56%, no reprovado 12 alunos ou 1,43%.
Iha fatin seluk Tezoreira KIAR mos apresenta relatorio orsamentu kontribuisaun inan aman nian, nebe kontribui mai iha eskola hodi selu professores kontratadu sira. Kontribuisaun ba Alunos foun AE-2026 mak U$99 no mos alunos tuan nian U$38 ba tinan ida nian.
Ikus liu Presidente KIAR Sr.Paulo hato’o nia intervensaun ba inan aman katak, oinsa inan aman nia involvimentu ba oan sira nia edukasaun, nune’e bele kontribui ba oan sira nia estudu durante eskola iha eskola ida ne’e. Oinsa inan aman sira hanorin oan sira kona etika moral, nune’e sira bele iha moral no attitude diak, iha eskola no iha future be mai, wainhira kontinua ba ensinu superior.
Presidente KIAR mos hato’o nia planu kona ba kontribuisaun ba Tinan Eskolar 2026 nian, tamba maski Ministeriu Edukasaun koloka ona professores sira mai iha eskola maibe, professores materia balun mak sei menus tan ne’e husu ba inan aman atu kontribui nafatin, nune’e bele selu ba professores kontratadu sira, hodi hanorin ita nia estudantes sira.
Hafoin enkontru inan aman sira ida-idak tama sala de aula hodi simu ida-idak nia kaderneta husi kada director da turma.
By team JPD
