Lospalos, 4 de julho de 2025
SEFOPE (Secretária de Estado da Formação Profesional e Emprego) hala’o espozisaun Kareira no Edukasaun ba estudante finalista sira (12.o ano ESG NKS AE-2025) iha Ginasiu (GOR-Gedung Olah Raga) Lospalos.
Objetivu husi espozisaun Karreira no Edukasaun ida-ne’e maka atu orienta estudante finalista sira iha nivel eskola sekundária sira, atu nune’e sira bele foti desizaun ne’ebé klaru ba sira nia futuru. Se sira hili atu kontinua ba Ensinu Superiór, ne’e signifika katak sira-nia inan-aman fó apoiu ba sira atu atinje sira-nia mehi iha futuru.
Aleinde ne’e, estudante finalista sira bele aprende kona-ba funsaun serbisu nian iha espozisaun ne’e. SEFOPE halo ona vizita ba eskola ESG/Sekundaria hamutuk 10 iha Munisípiu Lautém, ho totál partisipante hamutuk 1.408 estudantes ne’ebé partisipa ona iha formasaun ne’e, tuir rezultadu relatóriu husi prezidente komisaun.
Maibé, karik labele kontinua ita-nia edukasaun ba nivel aas liu, ita-boot bele tuir kursu sira ne’ebé SEFOPE dezigna iha instituisaun oi-oin ne’ebé eziste ona hanesan: (SENAI Becora, Don Bosco Comoro, TIBAR, FMA Fuiloro, ADM Lospalos, etc…). Hafoin kompleta kursu, ita-boot bele halo estájiu sira iha instituisaun oioin ne’ebé eziste ona, no ikusmai ema ruma bele oferese serbisu ida ba ita-boot iha ne’ebá.
Ho razaun ida ne’e mak SEFOPE hala’o espozisaun Karreira no Edukasaun ida ne’e, liu husi aprezenta instituisaun oi-oin ne’ebé eziste ona hanesan: “SENAI Becora, TIBAR, FMA Fuiloro, ADM Lospalos, ESTV Lospalos, BNCTL, Telemor, Telkomcel, FDCH, CVTL, Pombeiros, nsst…”, atu nune’e bele introdús ba estudante finál sira ne’e mak serbisu sira ne’e, oportunidade ka fatin kursu ne’ebé disponivel ba sira, ne’ebé labele kontinua sira-nia estudu to’o nivel tersiáriu tanba inkapasidade husi inan-aman, ka hetan lalais serbisu no moris mesak.
Tanba ne’e mak programa SEFOPE tinan-tinan halo espozisaun hanesan ne’e ba estudante finalista sira, nune’e sira bele habelar sira nia orizonte ba futuru no evita ansi ba kazamentu. Sira labele tau matan ba sira-nia an rasik, sa tan ema seluk, sa tan uma-kain ida, tau matan ba sira nia oan no feen sira, no todan ne’ebé laiha rohan hosi lisan sira—ne’ebé buat hotu sai sira ne’ebé harii ona família nia kabas leten.
Programa SEFOPE perfeitu ba sira, ajuda sira habelar sira nia orizonte no foti desizaun sira ne’ebé informadu. Antes espozisaun Karreira no Edukasaun ne’e realiza, SEFOPE hala’o ona programa divulgasaun komunitária iha Eskola Sekundária sira hodi fahe informasaun ne’e ba labarik finalista sira ne’ebé hela iha Munisípiu Lautém.
Hafoin serimónia abertura, kontinua ho almosu hamutuk, no diresaun husi Diretór Jerál SEFOPE husi Dili, FDCH, Xefe Departementu SME (Servisu Munisipal Edukasaun), sira hotu fó diresaun ba sira atu foti desizaun ne’ebé loos ba sira nia futuru ne’ebé nabilan.
Eventu ne’e hetan partisipasaun husi Diretór Jerál SEFOPE ho nia ekipa sira husi Dili, Sekretáriu Munisípiu Lautém, Segundu Komandante PNTL reprezentante SME sira, no estudante Sekundáriu sira husi eskola oi-oin iha munisípiu Lautém. Espozisaun ne’e hala’o durante loron rua, Sesta no Sábadu, 4-5 Jullu 2025, iha Ginasiu Lospalos.
Eskritor: EdoSantos’25
