JPD-ESG NKS Lospalos – Gabinete Diretiva Eskola Sekundária Jerál (ESG) Nino Konis Santana Lospalos foti desizaun rigorozu hodi fó sansaun suspende ba estudantes turma ida, tanba hatudu atitude ne’ebé la tuir kódigu étika no abusa professora sira iha sala laran.
Desizaun ne’e foti liuhusi enkontru extraordinariu ida ne’ebé realiza iha salaun enkontru eskola nian, iha loron Segunda-Feira (01/06/2026), ne’ebé organiza husi Diretor da Eskola, Diretor da Turma, Divisaun Alunus ho Inan-Aman inklui estudante problematiku sira.
Kronolojia no Kazu Atitude Estudante
Tuir esplikasaun husi Diretor da Eskola no Diretor da Turma katak, kazu ne’e akontese iha loron 28 Fevereiru 2026, ne’ebé envolve estudante sira husi Klasse 11º ano CSH, Turma D. Estudante sira ne’e hatudu hahalok abusa, lakohi tuir matéria, barullu, han iha sala laran, no kria instabilidade hodi hakarak sai husi eskola atu ba uma, bainhira Profesora Bahasa Indonesia, Sandra (naran samaran), nebe fó hela aula.
Hahalok aat ne’e la’ós foin halo dala ida, maibe beibeik ona. Eskola nota katak kazu ne’e ba dala rua ona, liu deit fulan lima nia laran depois de sira halo mós kazu ne’ebé hanesan hasoru Professora Ekonomia nian ida uluk.
“Professora Bahasa Indonesia (Sandra) ne’e mai hanorin hanesan voluntáriu iha eskola ne’e, la’ós eskola ka governu mak selu, maibé Embaixada Indonézia mak selu hodi mai hanorin iha ne’e. Maibé, estudante sira abusa fali nia, wainhira nia tama atu hanorin nia materia” tenik Diretor da Eskola.
Sansaun Rigorozu husi Eskola
Hodi responde ba problema króniku ne’e, gabinete diretiva eskola foti ona medida ne’ebé rigorozu sira hanesan tuir mai:
- Sei fo tempu ba estudante sira ne’ebe la marka prezensa: Ba Estudantes sira ne’ebé falta no la mai tuir enkontru importante ne’e, eskola sei fo tempu atu mai aprezenta-an ho inan aman para sira bele eskola nafatin iha ne’e ou transfere ba eskola seluk.
- Sansaun Skór (Suspende): Estudante sira seluk simu sansaun skór (suspensaun) durante semana ida iha uma la tuir prosesu aprendizajen, hahú husi loron 1 to’o 6 Juñu 2026, no sei tama fali eskola iha loron 8 Juñu. Sira mós konsidera falta ba matéria 13 ne’ebé sira simu.
- Anula (disolve) Turma: Tanba karakter estudante nian ne’ebé aat, Turma D anula/disolve tiha ona, no estudante sira ne’ebé hakarak duni eskola sei fahe fali ba turma seluk.
- Sansaun ba Inan-Aman la Mai: Ba estudante na’in haat (4) ne’ebé tuir enkontru maibé sira-nia inan-aman la mai, eskola sei fó fali sansaun ketak (espesiál) ba sira.
Diretor da Eskola mós dehan katak, bazeia ba lei labele baku estudante (tanba se mak baku karik mestre mak sei hetan kastigu), desizaun foti sansaun administrativu no suspensaun ne’e mak dalan ne’ebé loos hodi fó lisaun ba estudante sira.
Iha parte seluk, responsabilidade tomak ba jestaun turma ne’e nian entrega ba kompetensia husi Diretor da Turma, Mr. Tobias, hamutuk ho Xefe da Turma, Andreas, no Vise Xefe da Turma, Adolfino.
Escritor: Ekipa JPD (EdoSantos’26)
Leave a Reply